پیغام مصور

'8 September 1938'

پیغامِ مُصوّر

سمتِ مشرق سے عیاں ہے کوئی منقلب اب ہے جہاں ہے کوئی

عکس تیرا ہے جہاں ہے کوئی اُٹھ کہ تیرا نگراں ہے کوئی

ماورا ہوکے ریاح و خوں سے تیری رگ رگ میں رواں ہے کوئی

سامنے اِس کے ہے شمشیر بھی ہیچ اب سرِ نوک زباں ہے کوئی

وہ ترا اِشہَبِ پرداز نہ ہو سرِ افلاک رواں ہے کوئی

یہ ترے دست مبارک میں ہے کیا کہکشاں ہے کہ کماں ہے کوئی

اِک نظر دیکھ سوئے عالم کون تجھ سے پلّہِ میں گراں ہے کوئی؟

تو ذرا اپنی حقیقت بھی سمجھ کہ ترا مثل کہاں ہے کوئی

ہاں اسی معرکۂ ہستی میں مرجعِ امن و اماں ہے کوئی

تُو اسے گوشِ حقیقت ہی سے سُن میرے نغموں میں نہاں ہے کوئی

یا یہ ہے صوت لسانِ ملکوت یا ملائک کا بیاں ہےکوئی

نغمۂ سازِ نفس سُن سنکر محوِ گلُبانگ اذاں ہے کوئی

چشمِ صنّاعِ دوعالم میں ابھی مطمحء نظم جہاں ہےکوئی

راکبِ غرب ہے محوِ پستی دستِ قدُرت میں عنان ہے کوئی

کیفِ سرمایہ پرستی معلوم؟ مائل فقر یہاں ہے کوئی

تجکو حاصل ہے کمالِ ہستی اور بے تاب و تواں ہے کوئی

سربکف ارض مُقدّس پہ ہے کون تیری ملّت کا جواں ہے کوئی

ہاں سمجھ لے کہ یہ تہذیبِ جدید عشوۂ شیشہ گراں ہے کوئی

اُن پہ واجب ہی نہیں شُرابِ حرام ساقئ تشنہ لباں ہے کوئی

کُفر اور جذبۂ اسلام غلط یہ بھی نیرنگِ زماں ہے کوئی

کبھی پیغامِ مُصوّر کو بھی سنُ نعرۂ زن شیرِ ژیاں ہے کوئی

آسان اردو – جستجو میڈیا

شیرِ ژیاں- غضبناک شیر

عشوہ- ناز، ادا، فریب

--گُل بانْگ [گُل + بانْگ (ن غنہ)]فارسی اسم  کیفیت    . چہکار، پھول جیسی نرم و لطیف آواز، بلبل کے چہکنے کی آواز، بلبل کی چہکار، صوتِ ہزار، دل خوش کن آواز۔

مطمح - مقصود اشہب- سیاہ گھوڑا، سبز گھوڑا

پرداز – رنگ، ڈھنگ، تمہید، اُٹھان