اقتدار لامکاں

01/01/38

DDMMYY

اقتدار لامکاں

ملا ہے بخت سے وہ اقتدار لامکاں مجکو

نظر آتے ہیں ہفت افلاک ہی سیّارگاں مجکو

کوئی محفوظ اس کی زد سے رہ سکتا نہیں ہرگز

عطا کی ہے وہ قدرت نے کمانِ کہکشاں مجکو

تسلّط ہے مرے ذہن و نظر کا ذرّے ذرّے پر

نہ سمجھیں بے خبر منزل سے اہلِ کارواں مجکو

ڈبوسکتا ہوں جس میں جابرانِ دہر کی ہستی

مرے خالق نے بخشا ہے وہ بحرِ بے کراں مجکو

وہ استقلال ہے میرا، وہ میرا عزم صادق ہے

کیا ہے جس نے مرہونِ حیات جاوداں مجکو

نہیں میں ان سجود ظاہری پر مطمئن اپنے

جبیں کو اور کرنا ہے رہنِ آستاں مجکو

سرورغم سے ہے اے چرخِ بالاتر مری ہستی

دکھاکر کیا کرے گا منظر سودوزیاں مجکو

مری گم گشتگی پر ہنس نہ تو اے رہبرِ مغرب

کہ ہر شمع ہدایت نقشِ پائے رفتگاں مجکو

مرے انفاس کیف آگیں و آثار حیات آئیں

گلستانِ وطن میں ہیں بہارِ بے خزاں مجکو

درخشاں ہی درخشاں گلشنِ ہستی کے منظر پر

نظر آتا ہے اب مستقبلِ ہندوستاں مجکو

کوئی دیکھے علو کے نظم مشرق میری آنکہوں سے

نظر آتا ہے وہ لیتے ہوئے انگڑائیاں مجکو

میں اک آزاد فطرت مردِ میدانِ مشیت ہوں

یہاں ہونے لگا کیوں خدشہء قید مکاں مجکو