ترغیب کمال

“ 29 July 1938”

ترغیب ِ کمال

مُرتّب کربلا کی خاک سے اک کارواں کرلے

ضرورت ہو تو رنگیں تو بھی اپنی داستاں کرلے

اجل کو حرزِ جاں کرلے فلک کو ہم عناں کرلے

جو ممکن ہو تو خود کو حاصلِ دورِ زماں کرلے

کسی پر رازِ دل اپنا عیاں کرنیسے تو پہلے

جہاں کے ذرّے ذرّے پر گُمانِ رازداں کرلے

ترا کہنا بجا اے رہروِ راہِ طلب لیکن

بگولے پر کوئی کیوں کر یقینِ کارواں کرلے

جو لمحے بیش قیمت رہ گئے ہیں تیری ہستی کے

نہ اُن کو بھی شریکِ زندگیء رائیگاں کرلے

یہاں پرواز ممکن بہ حدِّ وسعتِ دانش

ثرّیا کی روش پر انحصارِ آشیاں کرلے

تری ہستی کو طوفانِ حوادِث کی ضرورت ہے

خود اپنے آشیاں کو مسکنِ برقِ تپاں کرلے

فسوں میں اُس کے پوشیدہ زوالِ علم و عرفاں ہے

جنوں کو دانشِ افرنگ سے تو بدگُماں کرلے

فدا تیری سحر خیزی پہ اندازِ جہاں بانی

دلِ خوابیدہ کو بیدار ہنگامِ اذاں کرلے

نہ رہنے پائے تیرے تن میں سوزِ غیریت باقی

خودی کی آگ میں جل جا خودی کو پاسباں کرلے

حرارت ہے اگر ایماں کی تیرے قلب میں کچھ بھی

تو ہر آتشکدے پر اعتبارِ گلستاں کرلے

نہ جا تو دانشِ حاضر کی اس معجزنمائی پر

خرد کے نور سے تجزیہ کوَن و مکاں کرلے

بہادے غازہء مغرب کو غیرت کے پسینے میں

جمالِ حال میں پیدا جلالِ رفتگاں کرلے

ہرآنے والے خطرے کا خوشی سے خیرمُقدّم کر

رگِ امروز میں تو خونِ فردا کا رواں کرلے

حرم کی عظمت و حرمت پہ سو رنگینیاں صدقے

خود اپنے جامہء احرام کو بھی خون چکاں کرلے

مسولینی و ہٹلر کی حقیقت کیا ترے آگے

اُنہیں بھِی تو گلیم شاہِ بطحا میں نہاں کرلے

بِساطِ غرب اُلَٹ دی میرے پیغامِ حقیقت نے

فراہم کاش مجھ سے جراء ت، شرح وبیاں کرلے

آسان اردو=جستجو میڈیا

گلیم=(فارسی، ترکی) چادر، بُنی ہوئی ترکی، ایرانی چادر، قالینی اوڑھنی